. Umcimbi wokuphelezela ubuhlelwe uMasipala wesifunda Amajuba ngaphansi kobuholi beMeya uKhansela Thembelihle Mthembu kanye nomasipala waseNewcastle oholwa yiMeya uCllr Xolani Dube. Lokhu kubambisana kugcizelela ukuzibophezela kwabo bobabili omasipala ekwesekeni ithalente lezemidlalo lasekhaya kanye nokugqugquzela ukuthuthukiswa kwebhola likanobhutshuzwayo esifundeni. Ukukhombisa ubumbano nokweseka, izimeya zizwakalise ukujabula nokuzigqaja ngokuzuzwe yileli qembu ukuthi lize lifinyelele lana eselikhona. “Sijabule futhi siyaziqhenya ngani Bafana Bes’busiso,” kusho iMeya uMthembu. "Siyazazi izinselelo ezahlukene enizobhekana nazo, kodwa noma ngabe kunjalo, sisemva kwenu ngokuphelele. Uma ningena kowamanqamu esingenakho ukungabaza ukuthi nizongena, nakanjani sizokwenza isiqiniseko ukuthi siyabakhona egameni labantu besifunda sethu." IMeya kaMasipala Amajuba uKhansela Thembelihle Mthembu ufake isandla ngezokuthutha ukuze abafana bafike oGwini, kwase kuthi uMasipala wase Newcastle wona ubathengele umfaniswano webhola. I-KZN Hollywoodsbets Provincial Playoffs, ehlelelwe ukuba seSifundeni Ugu kusukela ngoJuni 13-15, 2025, ithembisa ukuthi izoba ngumdlalo othokozisayo, lapho amaqembu e-Hollywoodsbets Men's Regional Leagues elwela ithuba lokudlulela ku-KZN ABC Motsepe League. I-Newcastle Warriors izimisele ngokwenza kahle futhi izitholele indawo kuligi ehlonishwayo. Njengoba leli qembu libheke kowamanqamu, lithwele amathemba nezifiso zesifunda saseMajuba kanye nomasipala waseNewcastle. Ngokusekelwa ngomasipala kanye nokuzinikela kwabo okungaguquki, i-Newcastle Warriors ikulungele ukunikela ngakho konke futhi ibambe iqhaza eligqamile njalo ku-KZN Hollywoodsbets Provincial Playoffs.