11 kuNdasa 2026 UMASIPALA Wesifunda Amajuba, oholwa iBamba leMeya uKhansela Thembelihle Mthembu, ubambe ngempumelelo umhlangano wokubonisana namaKomiti AmaWadi eDedangendlule Community Hall eDanawozi njengengxenye yohlelo lokubandakanya umphakathi ekubuyekezeni usomqulu wentuthukho edidiyelwe (IDP). Lo mhlangano uhuholwa uSomlomo womkhandlu uMntwana Siphamandla Zulu ebambisene noKhansela Ntombenhle Ndlovu.
Lo mhlangano ubeyingxenye yochungechunge lwemihlangano yokubonisana ezokwenzeka kuso sonke isifunda njengokulungiselela ama-IDP Roadshows azoba ngoMbasa 2026. Umhlangano unikeze amaKomiti AmaWadi ithuba lokuveza izinkinga zomphakathi, ukwabelana ngezinto ezibalulekile ekuthuthukisweni kwemiphakathi kanye nokuxoxisana ngqo nobuholi bomasipala. Ekhuluma nalabo ebebekhona, egameni leMeya ebambile uKhansela Mbongeni Hlatshwayo ugcizelele ukubaluleka kokubandakanywa komphakathi ekuhleleni ikusasa lentuthuko yesifunda. “Usomqulu wentuthuko edidiyelwe uyithuluzi elibalulekile eliqinisekisa ukuthi amazwi omphakathi ayayithola indawo emsebenzini esiwenzayo njengohulumeni.
Le mihlangano isinika ithuba lokulalela izidingo zabantu bakithi ukuze izinhlelo zentuthuko ziphendulwe ngqo kulokho abakudingayo. Thina njengo buholi besifunda senza ngakho konke okusemandleni ukuthi abantu sibabeka eqhulwini, njengalokhu esasikuthembisile uma siya ebantwini.” UKhansela Hlatshwayo uphinde wagcizelela ukuthi ukuxoxisana namaKomiti AmaWadi kuqinisa ubudlelwane phakathi kukaMasipala nomphakathi abawusebenzelayo. Ube esegcizelela ukubaluleka kokuthi imiphakathi kumele izame ukukhokhela izidingo zayo ukuze uMasipala ukwazi ukuqhubeka noku letha izidingo ebantwini. Amalungu amaKomiti AmaWadi abambe iqhaza elibonakalayo ezingxoxweni, eveza izindaba ezibalulekile ezithinta ukuhlinzekwa kwezinsiza, ukuthuthukiswa kwemiphakathi kanye nezinto ezimqoka okufanele zicatshangelwe ezinhlelweni zikaMasipala.
Lo mhlangano uyingxenye yokuzibophezela kukaMasipala ekuqinisekiseni ukuphatha ngokusobala, ukubika kubantu kanye nentuthuko ebandakanya wonke umuntu. Uphiko lwezezinhlekelele kuMasipala wesifunda Amajuba nalo ludlulise izixwayiso kanye neziluleko okumele abantu bazisenzise baphinde baziqaphe njengoba kuzoqala ubusika. Amalungu amaKomiti AmaWadi nawo athole ithuba lokubeka izimfuno, nezimvo zabo. "Ukusebenzisa izimoto ezithutha amanzi akuyona into esiyithokozelayo nathi siyasebenza ngokuzimisela ukuthi izihlelo esinazo zikwazi ukuthula umthwalo emiphakathini yethu ebhekene nawo. Ziningi izinhlelo esinazo esiphezu kwazo njengo uMkhandlu ukuthuthukisa izimpilo zezakhamizi zethu." Kubeka iBamba leMeya uKhansela Thembelihle Mthembu.
Umphakathi kuso sonke isifunda uzothola amathuba amaningi okuxhumana nobuholi bukaMasipala ngesikhathi sama-IDP Roadshows azokwenzeka ngoMbasa 2026.
Lo bambe njenge Menenja uNkk Nandi Dlamini ephendule imibuzo ebithulwa amaKomiti AmaWadi, uvumile ukuthi inkinga ikhona yona lokho angeke sikubalekele, kodwa njengo Mkhandlu bazothola indlela yokuqinisekisa ukuthi inkinga yamanzi iyalandelelwa, kanye nezisebenzi ezingenzi okufanele bazobhekana nazo.